Bim Coiffeur Mani Matter

Bim coiffeur bin i gsässe vor em Spiegel, luege dry

und gseh dert drinn e Spiegel wo ar wand isch vis-ä-vis

und dert drinn wider spieglet sech dr Spiegel da vor mir

und i däm Spiegel widerum dr Spiegel hindefür

Und so geng wyter: s’isch gsy win e länge koridor

I dämm my chopf gwüss hundertfach vo hinden und vo vor

isch ufgreit gsy i eir kolonne, z’hinderscht isch dr chopf

i ha ne nümme gchennt, so chly gsy win e gufechnopf

My chopf dä het sech dert ir wyti, stellet öich das vor

Verloren ir unäntlechkeit vom länge koridor

I ha mi sälber hinde gseh verschwinde, ha das gseh

Am heiterhälle vormittag und wi we nüt wär gscheh

Vor chlupf han i mys muul ufgsperrt, da sy im koridor

Grad hundert müler mit ufgange win e männerchor

E männerchor us mir alei, es cheibe gspässigs gfüel

Es metaphysischs grusle het mi packt im coiffeurgstüel

I ha d’serviette vo mer grissen, ungschore sofort

Das coiffeurgscbäft verla mit paar entschuldigende wort

Und wenn dir findet i sött e chly meh zum coiffeur ga

De chöit dir jitz verstah warum i da e hemmig ha